那個送你Dream Big頸鍊的老公

January 17, 2021

上年12月頭，收到一個趕急嘅Order：客人Tony想訂Dream Big 鑽石頸鍊比佢太太Pinky。 

臨近節日，都會收到唔少急單，通常係因為要趕去Party，又或者約咗某一晚食飯要送禮。但Tony嘅原因，係佢要搭飛機去澳洲見太太了，所以呢張單係紅色警報訊號嘅特急！

特急單就要睇吓好唔好彩有無現貨，尤其要鑲鑽石嘅呢款。

返到工作室，枱上面有一排呢個系列嘅頸鍊。我好緊張咁遂條頸鍊反轉，睇吓有無Dream Big⋯⋯唉，無啊！！！！  

但係有一個玫瑰金鑲咗鑽石但未刻字嘅吊咀。 

因為只係剩返呢個吊咀，我只得一次機會！所需嘅集中力同埋眼力，簡直係去到拆彈剪邊條金屬線咁focus。我當時個樣，應該係對眼突晒出嚟又鼻窿擴大咁款，氣都唔敢抖等啲氧氣自己走入去鼻窿算！    

最後搞掂！Thank God!!! 有種坐完過山車嘅虛脫！

即刻同Tony報喜！回神之後，諗起訂Dream Big嘅客人，好多都係比自己，又或者送比朋友。老公送比太太，我有一種莫名嘅感動。我梗係要問啦！

 

「因為疫情，我哋一家四口已經分隔兩地一年了，

佢一個人係澳洲又要照顧大女又要打理頭家好犀利。

所以當我去到一家團聚嘅時候，我想俾返太太可以做返佢自己鍾意做嘅事。

佢鍾意煮嘢食，所以我打算同佢一齊係澳洲開一間小Cafe，發揮佢嘅所長，

所以揀咗Dream Big勉勵佢。」

 

嫁得好！呢位太太中咗世紀頭獎！嫁咗一個覺得自己照顧家人而好犀利，又支持自己Dream Big嘅老公！上上簽！上上簽！

對於夢想，有時旁人唔出聲已經算係幫忙（冷水永遠比熱水多）。但當你生命中嗰位陪你到最後嘅人係支持你去追夢的話，就好似你要爬一條追夢嘅木梯，而佢就喺下面扶實，等你安心一步步爬上去。你無事時佢幫你扶穩條梯，你爬到驚嘅時候望返轉頭，佢會叫你繼續爬唔洗驚，就算你落返嚟佢都一樣喺度。 

幾日前我再問 Tony 近況，佢話：

「多謝你！我哋呢邊生活都好好呀。我太太仲好鍾意條頸條鏈添」

如果將來我去澳洲，希望食到太太Pinky煮嘅嘢啊！

(圖片為 Tony 及 Pinky ❤️）

 

#Dreambig #greenrivor #empowerment #diamondnecklace #encouragement

Share:

Leave a comment

Comments will be approved before showing up.

Name *

Email *

Comment *